Qaro koʻzum, kelu mardumlugʻ emdi fan qilgʻil

Alisher Navoiy · Vazn: aruz · Radif: qilgʻil · Mumtoz davr

Qaro koʻzum, kelu mardumlugʻ emdi fan qilgʻil, #

Koʻzum qarosida mardum kibi vatan qilgʻil. #

Yuzung guliga koʻngul ravzasin yasa gulshan, #

Qading niholigʻa jon gulshanin chaman qilgʻil. #

Takovaringgʻa bagʻir qonidin hino bogʻla, #

Itinggʻa gʻamzada jon rishtasin rasan qilgʻil. #

Firoq togʻida topilsa tufrogʻim, ey charx, #

Xamir etib yana ul togʻda koʻhkan qilgʻil. #

Yuzung visoligʻa yetsun desang koʻngullarni, #

Sochingni boshtin-ayoq chin ila shikan qilgʻil. #

Xazon sipohigʻa, ey bogʻbon, emas moneʼ, #

Bu bogʻ tomida gar ignadin tikan qilgʻil. #

Yuzida terni koʻrub oʻlsam, ey rafiq, meni #

Gulob ila yuvu gul bargidin kafan qilgʻil. #

Navoiy, anjumani shavq jon aro tuzsang, #

Aning boshogʻliq oʻqin shamʼi anjuman qilgʻil. #